मुख्य संपादक मुनिश्वर बोरकर
ब्रम्हपुरी : (प्रतिनिधी): तालुक्यातील मौजा बोडधा येथील जंगल परिसरात आज, २ एप्रिल २०२६ रोजी सायंकाळच्या सुमारास अचानक भीषण वणवा पेटला आहे. वाऱ्याचा वेग आणि कोरड्या पालापाचोळ्यामुळे ही आग झपाट्याने पसरत असून, या वणव्यामुळे परिसरातील गावे हळदा, बोडधा, बल्लारपूर, मुडझा इत्यादी अनेक गावे बेचिराख होण्याची भीती वर्तवण्यात येत आहे.
मिळालेल्या माहितीनुसार, सायंकाळच्या वेळी जंगलातून आगीच्या ज्वाळा दिसू लागल्या. पाहता पाहता या आगीने रौद्र रूप धारण केले आहे. या परिसरात मानवी वस्त्या आणि शेतशिवारे असल्याने नागरिकांमध्ये प्रचंड घबराट पसरली आहे. जर आग वेळीच आटोक्यात आली नाही, तर मोठे जनजीवन आणि वित्तहानी होण्याची शक्यता नाकारता येत नाही.
*प्रशासकीय दुर्लक्षामुळे संताप*
या गंभीर परिस्थितीची दखल घेत भारतीय कम्युनिस्ट पक्षाचे नेते कॉम्रेड विनोद झोडगे पाटील यांनी प्रशासनावर ताशेरे ओढले आहेत. “वणव्याची भीषणता पाहता संपूर्ण बोडधा परिसर धोक्यात आला आहे. अनेक गरिबांची घरे आणि शेती या आगीच्या भक्ष्यस्थानी पडू शकते. मात्र, अद्याप प्रशासकीय यंत्रणा घटनास्थळी पोहोचली नसल्याचे दिसून येत आहे,” असे त्यांनी म्हटले आहे.
*तातडीने मदतीची मागणी*
कॉम्रेड झोडगे पाटील यांनी तहसील कार्यालय आणि वन विभागाला कडक शब्दांत आवाहन केले आहे की, परिस्थितीचे गांभीर्य ओळखून तातडीने अग्निशमन दलाच्या गाड्या आणि वनविभागाच्या कर्मचाऱ्यांना घटनास्थळी पाठवण्यात यावे. आगीवर नियंत्रण मिळवण्यासाठी युद्धपातळीवर प्रयत्न न झाल्यास होणाऱ्या परिणामांना प्रशासन जबाबदार राहील, असा इशाराही त्यांनी दिला आहे.
सध्या स्थानिक नागरिक आपल्या स्तरावर आग विझवण्याचा प्रयत्न करत आहेत, परंतु आगीची व्याप्ती पाहता त्यांना मोठ्या मदतीची गरज आहे. आता सर्वांचे लक्ष तहसील प्रशासन आणि वन विभागाच्या भूमिकेकडे लागले आहे.
— कॉम्रेड विनोद झोडगे पाटील ब्रह्मपुरी
प्रतिलिपी :- सन्माननीय संपादक/ वार्ताहर यांना सविनय कळविण्यात येते की, आपल्या लोकप्रिय दैनिकांमध्ये वरील बातमी प्रसिद्ध करावी ही विनंती
— कॉम्रेड विनोद झोडगे पाटील ब्रह्मपुरी
दिं ३/१०/२०२६
