ज्वाला न्यूज
देसाईगंज:
देसाईगंज तालुक्यातील कुरूड येथील एका मच्छिमाराचा वडगाव (रिठ) येथील तलावात बुडून मृत्यू झाल्याची हृदयद्रावक घटना घडली आहे. या घटनेमुळे परिसरात शोककळा पसरली आहे..
नेमकी घटना काय?
कुरूड येथील मच्छिमार सोसायटीच्या वतीने काही मच्छिमार वडगाव (रिठ) येथील तलावावर मासेमारी करण्यासाठी गेले होते. यावेळी मासेमारी करत असतानाच, कुरूड येथील रहिवासी आणि मच्छिमार सोसायटीचे सदस्य असलेले खुशाल शंकर मेश्राम (वय ४०) यांचा तलावात बुडून मृत्यू झाला.
पोलीस आणि प्रशासकीय कार्यवाही
घटनेची माहिती मिळताच देसाईगंज पोलिसांनी तातडीने घटनास्थळी धाव घेतली. मृतदेह ताब्यात घेऊन उत्तरीय तपासणीसाठी (पोस्टमार्टम) देसाईगंज येथील ग्रामीण रुग्णालयात पाठवण्यात आला. देसाईगंज पोलीस ठाण्यात आकस्मिक मृत्यूची नोंद करण्यात आली असून, उत्तरीय तपासणीनंतर मृतदेह नातेवाईकांच्या ताब्यात देण्यात आला. मेश्राम यांच्यावर कुरूड येथील वैनगंगा नदी घाटावर अंत्यसंस्कार करण्यात आले.
परिसरात हळहळ
कुरूडच्या इतिहासात मासेमारी करताना घडलेली ही पहिलीच दुर्दैवी घटना असल्याचे सांगितले जात आहे. अचानक घडलेल्या या घटनेमुळे मेश्राम कुटुंबीयांवर दुःखाचा डोंगर कोसळला असून, संपूर्ण गाव व परिसरात हळहळ व्यक्त केली जात आहे.
