📰 “जी शेतकऱ्यांची भूमिका, तीच आमची भूमिका”; जमीन अधिग्रहणाविरोधात गावोगावी आझाद समाज पार्टीचा जनसंवाद दौरा.

ज्वाला न्यूज

गडचिरोली | प्रतिनिधी

गडचिरोली जिल्ह्यात विविध प्रकल्प व खाणींसाठी सुरू असलेल्या जमीन अधिग्रहण प्रक्रियेविरोधात शेतकऱ्यांचा आवाज बुलंद करण्यासाठी मुधोली, येनापूर, वायगाव, दुर्गापूर, कोनसरी आणि चित्तरंजनपूर या गावांमध्ये जनसंवाद व चर्चा दौरा आयोजित करण्यात आला.

या दौऱ्यात शेतकऱ्यांना देण्यात आलेल्या नोटिसा, त्यावरील आक्षेप, न्यायालयीन लढा, तसेच प्रत्यक्ष मैदानातील संघर्ष यासंदर्भात सखोल चर्चा करण्यात आली. अनेक शेतकऱ्यांनी आपल्या अडचणी, चिंता आणि जमीन वाचविण्याच्या लढ्याची भूमिका मांडली.

यावेळी उच्च न्यायालयात जनहिताच्या प्रश्नांवर लढा देणारे ॲड. बोधी, माजी जिल्हा परिषद सदस्य व माकपा जिल्हा सचिव कॉ. अमोल मारकवार, आजाद समाज पक्षाचे जिल्हाध्यक्ष राज बन्सोड, युवा जिल्हाध्यक्ष विकी खोब्रागडे, कृषी संघर्ष समितीचे जितेंद्र बांबोळे तसेच मानस मानकर उपस्थित होते.

उपस्थित नेत्यांनी शेतकऱ्यांच्या हक्कांच्या संरक्षणासाठी कायदेशीर आणि लोकशाही मार्गाने संघर्ष अधिक तीव्र करण्याचा निर्धार व्यक्त केला. “जी शेतकऱ्यांची भूमिका, तीच आमची भूमिका” हा संदेश देत शेतकऱ्यांच्या न्याय्य लढ्याला पूर्ण पाठिंबा जाहीर करण्यात आला.